Hərb tariximizin şərəfli səhifəsi olan və bizi qələbə zirvəsinə ucaldan 44 günlük Vətən müharibəsində xalqımızın qeyrətli və vətənpərvər oğulları erməni işğalçılarını məğlub etdilər, torpaqlarımızın düşmən tapdağında qalmasına son qoydular, uzun illər qədəmimizin dəymədiyi, nəfəsimizin toxunmadığı, həsrətini çəkdiyimiz yurdlarımızda üçrəngli bayrağımızı qaldırdılar.
Dövlət Sərhəd Xidməti Çevik Hərəkət Dəstəsinin Vətən müharibəsində iştirak etmiş hərbi qulluqçularının da göstərdikləri igidlik nümunələri heç vaxt unudulmayacaq. Onlar xalqımızın gözlədiyi Qələbə gününü reallığa çevirmək üçün öz layiqli töhfələrini veriblər.
Vətən müharibəsində Zəngilanın Vejnəli yüksəkliyində - Sığır(qızıl) yatağında - 7 oğul, 7 Şəhid 80 nəfərdən çox hərbçinin mühasirədən çıxmağına səbəb olan oğullar oktyabr ayının 22 - də Şəhid olublar. Yeddi oğuldan biri - Sərhəd Xidməti çevik hərəkət dəstəsinin əsgəri, Şəhid Səbuhi İsgəndərlidir.
Səbuhi İsgəndərli 25 iyun 2001-ci ildə Tərtər şəhərində anadan olmuşdur.Uşaq yaşlarında ailəsi ilə birgə Şəki şəhərinə köçmüşdür. 2007-2016-cı illərdə Şəki şəhər 11 saylı tam orta məktəbdə təhsil almışdır.
Səbuhi İsgəndərli 2019-cu ilin iyulundan Dövlət Sərhəd Xidmətinin Sərhəd Qoşunlarının Çevik Hərəkat Dəstəsində müddətli həqiqi hərbi xidmət edirdi.
Azərbaycan Ordusunun Sərhəd Qoşunlarının əsgəri olan Səbuhi İsgəndərli 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində iştirak etmişdir. Cəbrayıl, Füzuli və Zəngilanın azadlığı uğrunda gedən döyüşlərdə vuruşmuşdur. Səbuhi İsgəndərli 22 oktyabr 2020-ci ildə Zəngilan döyüşləri gedişatında rayonun Vejnəli kəndi istiqamətində döyüş tapşırığının yerinə yetirilməsi zamanı şəhid olmuşdur. 29 oktyabr 2020-ci ildə Şəki şəhərində yerləşən "Dovşan düzü" qəbiristanlığında dəfn olunmuşdur.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Səbuhi İsgəndərli ölümündən sonra "Vətən uğrunda" medalı ilə təltif edildi.
Azərbaycan ərazilərinin işğaldan azad olunması zamanı döyüş tapşırıqlarını yerinə yetirərkən şəxsi mərdlik və igidlik göstərdiyinə görə Azərbaycan Prezidenti İlham Əliyevin 18.12.2020-ci il tarixli Sərəncamına əsasən Səbuhi İsgəndərli ölümündən sonra "İgidliyə görə" medalı ilə təltif edildi.
Azərbaycanın Zəngilan rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Səbuhi İsgəndərli ölümündən sonra "Zəngilanın azad olunmasına görə" medalı ilə təltif edildi.
Azərbaycan Respublikası Müdafiə Nazirliyinin nəzdində yerləşən Həzi Aslanov adına "Ordu İdeoloji və Mədəniyyət Mərkəzi" Zabitlər Evində "Şəhidlər ölməz, Vətən bölünməz" adlı silsilə tədbirlər keçirilir. Belə tədbirlərdən biri də "Ay Media Company" təsisçi direktoru Almaz Yaşar tərəfindən Şəki şəhər Şəhidi İsgəndərli Səbuhi Yaşar oğlunun mövludu keçirildi.Tədbirdə Şəhidimizin ailə üzvləri, Şəhid ailələri, H.Aslanov adına "Ordu İdeoloji və Mədəniyyət Mərkəzi"nin rəisi, Polkovnik leytenant İlkin Qayıbov, "AY MEDİA COMPANY"nin əməkdaşları, DSX-nin əməkdaşları, Şəhidimizin döyüş yoldaşları, Qazilər, Şəhid Səbuhinin sinif rəhbəri Zaur müəllim Müslümov, KİV nümayəndələri, "Dəmir yumruq"Alfa A cəmiyyətinin sədri Ülviyyə xanım Əsədova və digər fəxri qonaqlar iştirak edirdilər.

Tədbiri giriş sözü ilə açan tədbirin təşkilatçısı "AY Media Company" təsisçi direktoru Almaz Yaşar qonaqları və Şəhid ailələrini salamlayaraq dedi:
- 27 sentyabr 2020-ci ildə Azərbaycan xalqı, dövləti və ordusu elə bir tarix yazdı ki, bu, bütöv bir millətin ləyaqət rəmzinə, milli qeyrət nümunəsinə çevrildi. Biz yağı düşmənin üstümüzə atdığı ləkəni təmizlədik, biz qamətimizi düzəltdik, biz 30 ildir itirdiyimiz dəyərləri özümüzə qaytardıq, biz illərlə həsrətində olduğumuz torpaqlarımıza qovuşduq. Biz heç nəyi unutmadıq, unutmadıqca da möhkəmləndik, gücləndik və nəhayət, dünyanın illərdir göz yumduğu ədalətsizliyi özümüz təkbaşına aradan qaldırdıq. Prezident, Müzəffər Ali Baş Komandan İlham Əliyevin ətrafında sıx birləşən Azərbaycan xalqı 30 illik mərhumiyyətə cəmi 44 günə son qoydu. Tariximizdə yeni səhifə yazıldı.Vətən müharibəsi Azərbaycan xalqının Zəfər məramına, milli kimlik mücadiləsinə, torpaq və Vətən sevgisinə şahidlik etdi.
Şəhidimizin Anası Gülnarə xanım çıxış edərək Şəhidimizin işığına gələn hər bir kəsi salamladı və Səbuhinin necə bir övlad olması haqqında danışdı.
Şəhidimizin sinif rəhbəri, eyni zamanda tarix müəllimi olan Zaur Müslümov Səbuhi haqqında bu fikirləri bildirdi:
---Bir müəllimin sevinci şagirdlərinin uğurlarıdır. Şagirdlər həyat yollarında nailiyyətlər qazanıb yüksələndə bu yüksəlişlər müəllimlərini sevindirir. Səbuhi elə bir əlçatmaz zirvəyə yüksəlib ki, həm məni qürurlandırıb, həm də kədərləndirib.
Vətənimizin Zəfər tarixinə adı qızıl həfrlərlə yazılmış Səbuhi İsgəndərli haqqında nə vaxtsa keçmiş zamanda danışacağımı düşünməzdim. Bu gün isə mənim üçün çox çətindir Səbuhi haqqında danışmaq.
Səbuhi İsgəndərlinin tarix müəllimi olmağımla yanaşı, həm də sinif rəhbəri olmuşam. Onu sakit təbiyətli, mehriban, eyni zamanda vətənpərvər bir şagird kimi tanımışam. Heç yadımdan çıxmaz, tədbirlərin birində mənə dedi ki, müharibə başlayarsa, mən könüllü olaraq cəbhəyə gedəcəm, düşmənlərimizdən qisas alacağam. Həmin vaxt Səbuhiyə azyaşlı olduğunu xatırlatdım. Cavabında isə Şah İsmayıl Xətainin 14 yaşında hökmdar olduğunu, dövlət qurduğunu dedi. Vətənimizə çox bağlı idi. Tarix dərsini diqqətlə oxuyurdu ki, vətənimizin keçmişini, qədimdən ta bu günə kimi olan düşmənlərimizi tanısın. Erməni qaniçənlərinə nifrəti də böyük idi. Dəfələrlə dərsdənkənar tədbirlərdə, anım günlərində Səbuhi düşmənlərimizin Qarabağda törətdikləri vəhşiliklər, xalqımızın başına açdığı zülmlər barədə çıxışlar etmişdi. Məktəbimizin məzunu Aprel döyüşlərində Şəhid olmuş baş leytenant Elnur İsgəndərov haqqında söhbət edərkən Səbuhi demişdi ki, xoşbəxt insandır, vətən uğrunda Şəhid olub. Bu cür Vətən qeyrətli bir oğul idi Səbuhi.
Deyirlər, kim Allahdan nəyi səmimi qəlbdən istəsə, Allah onu arzusuna çatdırar. Səbuhi İsgəndərli hər zaman Vətənimizin azad olunmasında düşmənlərimizə qarşı döyüşmək, ən uca zirvə olan Şəhidlik zirvəsinə ucalmaq istəyirdi və vətən uğrunda gedən döyüşlərdə qəhrəmancasına arzuladığı Şəhidlik zirvəsinə yüksəldi. Allah şəhadətini qəbul etsin, igidim.
Döyüş yoldaşları Səbuhinin döyüş yolundan, onun necə vətənpərvər biri olduğundan danışdılar.
Şəhidimizin mövludu həm də uyuduğu Şəki torpağında da qeyd olunub. Şəhid Səbuhinin adını daşıdığı Şəki şəhər, 11 saylı orta məktəbin müəllim və şagird kollektivi Şəhidin məzarına əklil dəstəsi qoyub, çıxış ediblər. Şəki Şəhid valideynləri, Qazilər, DSX -nin əsgərləri, döyüş yoldaşları Şəhidimizlə bağlı xatirələrindən danışıblar. Sonra isə dayısının adını daşıyan balaca Səbuhinin iştirakı ilə şəhidin adına bişirilən tort kəsildi.
Tədbirin bədii hissəsini müğənni Rəşad İsmayıl "Azərbaycan" mahnısı ilə açdı. Zabitlər evinin müğınniləri də öz mahnı töhfələrini qonaqlarımıza təqdim etdilər.
Tədbirin sonunda "AY MEDİA COMPANY" təsisçi direktoru Almaz Yaşar tərəfindən Şəhid ailəsinə Təşəkkürnamə təqdim edildi və xatirə şəkilləri çəkildi.

Almaz Yaşar
"AY MEDİA COMPANY"