Azərbaycanın telekommunikasiya və poçt xidmətləri üzrə tənzimləyici qurumu
İnformasiya Kommunikasiya Texnologiyaları Agentliyində (İKTA) Rəqəmsal İnkişaf və
Nəqliyyat Nazirliyi (RİNN) yanında İctimai Şura üzvləri ilə görüş keçirilib.
Rəqəmsal inkişaf və nəqliyyat nazirinin müşaviri Rəşad Bayramov və İKTA rəhbərliyinin
iştirakı ilə keçirilən görüşü giriş sözü ilə açan Agentliyin İdarə heyətinin sədri Nail
Mərdanov qurum tərəfindən 2024-cü ildə görülmüş işlər haqqında məlumat verib.
2024-cü ilin İKTA üçün məhsuldar olduğunu qeyd edən Agentlik sədri ötən il “E-Şikayət”
sistemi üzrə şikayətlərin statistikasını, telekommunikasiya xidmətlərindən istifadə üzrə
şikayət indeksini və şikayətlərin ortalama cavablandırılma müddətinin dərc edildiyini və
bir sıra elektron xidmətlərin istifadəyə verildiyini bildirib.
Bu elektron xidmətlər sırasında radioelektron vasitələrə icazələrin verilməsi, “E-Şikayət”
sistemi üzərindən poçt xidmətləri ilə bağlı müraciətlərin qəbulu, eyni zamanda məlumat
toplama sisteminin genişləndirilərək poçt rabitəsi operatorlarından da hesabatların
toplanıldığını qeyd etmək olar.
Qonaqlar Azərbaycanda mobil operatorların pərakəndə satış qiymətlərinin dövlət
tərəfindən tənzimlənmədiyi üçün qiymətlərin yüksək olduğunu, mobil operatorların
qiymətlərinin tənzimlənməsinin faydalı ola biləcəyini vurğulayıblar.
İKTA rəsmisi qeyd edib ki, bu gün qüvvədə olan qanunvericiliyə əsasən, mobil
operatorlar qiymətləri özləri müəyyən edirlər və bu qiymətlər dövlət tərəfindən
tənzimlənmir.
Görüşdə, həmçinin operatorlararası funksional “Local Exchange” arabağlantıların
səmərəli təşkili müzakirə predmeti olub. Osman Gündüz arabağlantı çətinliklərinin
olduğunu, lokal trafikin beynəlxalq mübadilə nöqtələri üzərindən “routing” olduğunu
deyib. İKTA sədri bu istiqamətdə monitorinqlər aparıldığını, nəticələrin qənaətbəxş
olmadığının müəyyən edildiyini, İKTA-nın nəzarəti altında arabağlantı portlarının sayının
artırıldığını qeyd edib: “Hazırda ölkədə “Tier 1” operatorlararası lokal trafik mübadiləsi
qənaətbəxş səviyyəyə gətirilib”.
Eyni zamanda 5G şəbəkəsinin qurulması və yeni qanunvericilik aktlarının hazırlanaraq
qəbul edilməsi istiqamətində müzakirələr aparılıb. Bildirilib ki, yeni qanun layihəsində
radiotezliklərdən müştərək icazə və mobil virtual şəbəkə operatoru icazələri nəzərdə
tutulub. Bu yeniliklərin ölkəmizdə mobil telekommunikasiya xidmətinin inkişafına
impulsiv təkan verməsi gözlənilir.
Müzakirələrin sonunda İctimai Şura sədri Siruz Abasbəyli çıxış edərək bildirib ki, İKTA
tərəfindən qısa müddətdə əhəmiyyətli layihələr həyata keçirilib və bu layihələrin daha da
effektiv olması üçün ictimai maarifləndirmənin genişləndirilməsinə ehtiyac var.

Həmçinin belə görüşlərin mütəmadi keçirilməsi, layihələrin, o cümlədən normativ hüquqi
akt layihələrinin hazırlanma prosesində İctimai Şura üzvlərinin də rəylərinin nəzərə
alınması tövsiyə olunub.
Qeyd edək ki, İnformasiya Kommunikasiya Texnologiyaları Agentliyi ölkədə informasiya
kommunikasiya texnologiyaları və rabitə (telekommunikasiya və poçt) sahələrində
tənzimləmə və nəzarəti, eləcə də radiospektr idarəçiliyini həyata keçirir.