Bu gün – 2 iyul ölkəmizin media məkanında özünəməxsus dəst-xətti, milli mövqeyi və dövlətçilik prinsipləri ilə seçilən "AYMEDIACOMPANY.AZ" informasiya portalının fəaliyyətə başlamasının 5 ili tamam olur.
Beş il əvvəl böyük məsuliyyət və yüksək amallarla təsis olunan portal qısa zaman ərzində Azərbaycan mediasında öz layiqli yerini tutaraq dövlətimizin milli maraqlarını, xalqımızın milli-mənəvi dəyərlərini və cəmiyyətimizin həssas məsələlərini daim diqqətdə saxlayan media orqanlarından birinə çevrilmişdir.
Portalın təsisçisi və baş redaktoru Almaz xanım Yaşar fəaliyyətə başladığı ilk gündən Azərbaycan dövlətçiliyinə, dövlətin həyata keçirdiyi siyasətə, milli maraqlarımıza və vətənpərvərlik ideyalarına sadiq mövqe nümayiş etdirərək peşəkar jurnalistika nümunəsi ortaya qoymuşdur. Onun rəhbərliyi ilə dərc olunan yazılar hər zaman obyektivliyi, dövlətçilik mövqeyi və cəmiyyət üçün faydalılığı ilə seçilmişdir.
Bu beş il ərzində "AYMEDIACOMPANY.AZ" təkcə xəbər yayan informasiya portalı kimi deyil, həm də sosial məsuliyyət daşıyan media qurumu kimi fəaliyyət göstərmişdir. Xüsusilə şəhid ailələrinin, qazilərimizin və veteranlarımızın problemlərinin işıqlandırılması, onların cəmiyyətə tanıdılması və qarşılaşdıqları çətinliklərin aidiyyəti qurumların diqqətinə çatdırılması istiqamətində mühüm işlər görülmüşdür.
44 günlük Vətən müharibəsindən sonra portalın kollektivi daim şəhid ailələrinin, qazilərimizin və müharibə veteranlarının yanında olmuş, onlar üçün xüsusi tədbirlər keçirmiş, xatirə mərasimlərinin, anım günlərinin, müxtəlif sosial layihələrin geniş şəkildə işıqlandırılmasına xüsusi önəm vermişdir.
Baş redaktor Almaz Yaşar şəhid ailələrinin və qazilərimizin problemlərinin həllinə hər zaman həssas yanaşmış, bir çox qazimizin əlillik və qazilik statusunun əldə olunması istiqamətində aidiyyəti qurumlara müraciətlər etmiş, onların hüquqlarının qorunması üçün böyük zəhmət sərf etmişdir. Bu fəaliyyət media nümayəndəsinin cəmiyyət qarşısında daşıdığı mənəvi məsuliyyətin parlaq nümunəsidir.
Portalın Mədəniyyət işləri üzrə direktor müavini Fərid Əmiraslanov olaraq mən də bu şərəfli missiyanın bir parçası olmaqdan qürur duyuram. Keçirilən çoxsaylı tədbirlərin təşkilində, proqramların hazırlanmasında, təqdimatların və tədbir mətnlərinin müəllifi kimi, eyni zamanda tanınmış ziyalıların, sənət adamlarının və ictimai xadimlərin bu tədbirlərə cəlb edilməsində üzərimə düşən vəzifələri böyük məsuliyyətlə yerinə yetirmişəm.
Şəhid övladlarının sevinc günlərində, ailələrin müxtəlif mərasimlərində, hərbi hissələrdə keçirilən tədbirlərdə iştirak etmək, onların sevincini və kədərini bölüşmək bizim üçün sadəcə peşə fəaliyyəti deyil, həm də vətəndaşlıq borcu olmuşdur.
Bu gün geriyə baxanda qürur hissi keçiririk. Çünki beş il ərzində minlərlə xəbər, yüzlərlə analitik yazı, onlarla sosial layihə və saysız-hesabsız tədbirlər vasitəsilə Azərbaycan dövlətçiliyinə, milli maraqlarımıza və cəmiyyətimizin inkişafına öz töhfəmizi verməyə çalışmışıq.
Bu uğurların təməlində isə peşəkarlıq, vətən sevgisi, dövlətə sədaqət və xalqa xidmət prinsipləri dayanır.
İnanırıq ki, "AYMEDIACOMPANY.AZ" qarşıdakı illərdə də eyni prinsipial mövqeyi qoruyacaq, Azərbaycan mediasında öz nüfuzunu daha da artıracaq, dövlətimizin və xalqımızın maraqlarına xidmət edən fəaliyyətini yeni uğurlarla davam etdirəcəkdir.
Portalımızın 5 illik yubileyi münasibətilə baş redaktorumuz və təsisçimiz hörmətli Almaz Yaşar xanımı, redaksiya kollektivimizi, müəlliflərimizi, oxucularımızı və fəaliyyətimizə dəstək olan hər kəsi səmimi qəlbdən təbrik edir, hər birimizə yeni uğurlar, möhkəm cansağlığı və Azərbaycan dövlətçiliyi naminə daha böyük nailiyyətlər arzulayırıq.
5 yaşın mübarək, "AYMEDIACOMPANY.AZ"! Yeni uğurlara doğru
Fərid Əmiraslanov
"AYMEDİACOMPANY.AZ" Mədəniyyət işləri üzrə direktor müavini
